दाङमा घटेन सवारी दुर्घटना - Butwal Online
दाङमा घटेन सवारी दुर्घटना

रीता लामा
घोराही, २९ चैत/ समथर भू–भाग भएको दाङको बाटोसमेत प्रायः समथर क्षेत्रमै भए पनि दुर्घटना भने अन्य जिल्लाको तुलनामा धेरै हुने गरेको छ । यहाँ अन्य जिल्लाको तुलनामा उच्च सवारी दुर्घटना हुने गरेको विभन्न तथ्याङ्कले समेत देखाएको छ ।


विशेषगरी ट्राफिक नियमको पालना नभएकै कारण अधिकांश दुर्घटना हुने गरेको प्रहरीको अनुसन्धानले देखाउँछ । त्यसमा पनि चालककै लापरवाहीले सवारी दुर्घटना बढ्दो अवस्थामा रहेको प्रहरीको निष्कर्ष छ । चालु आर्थिक वर्षमा ८५ बढी व्यक्तिको सवारी दुर्घटनामा परेर अकालमा मृत्यु भएको जिल्ला ट्राफिक कार्यालययसँग तथ्याङ्क छ । दैनिकजसो सवारी दुर्घटना हुने र मानवीय क्षति पनि हँुदै आएको छ ।
दुर्घटना रोक्न प्रहरी रातदिन खटिरहेको छ । तर वर्षौदेखि डर लाग्दोे अवस्थामा हुँदै आएका सवारी दुर्घटना न्यूनीकरण भने हुनसकेका छैनन् । ट्राफिक प्रहरीका अनुसार ९० देखि ९५ वटा सवारी साधनका चालक ट्राफिक नियमपालना नगरेकै कारण कारवाहीमा पर्ने गरेका छन् । रु पाँच सयदेखि रु एक हजार ५० सम्म उनीहरुले जरिवाना तिर्नुपरेको छ । चालु आर्थिक वर्षको साउनदेखि फागुनसम्म २२ हजार ७८९ सवारी साधनका चालक कारवाहीमा परेका छन् ।
ट्राफिक नियम विपरीत सवारीसाधन चलाउने चालकलाई कारवाही गर्दा रु एक करोड ३९ लाख ६९ हजार पाँच सय राजश्व सङ्कलन भएको ट्राफिक प्रहरीले जनाएको छ । दैनिक सरदर एकसय चालक कारवाहीमा परिरहँदा धेरै नियमविपरीत चल्ने मोटरसाइकल चालक देखिएका छन् । प्रहरीले बितेका आठ महीनामा नौ हजार १५ मोटरसाइकल चालकलाई कारवाही गर्दा रु ५८ लाख ३४ हजार जरिवाना सङ्कलन भएको छ ।
त्यसपछि ट्रकका चालक चार हजार ७१२ कारवाहीमा पर्दा रु २८ लाख ८३ हजार ५००, जीपका दुई हजार ६८७ चालक कारवाही पर्दा रु १५ लाख नौ ७००, बसतर्फ रु दुई हजार ६६४ चालक कारवाही पर्दा रु १४ लाख ९६ हजार राजश्व सङ्कलन भएको छ ।
त्यसैगरी दुई हजार ७१५ ट्याक्टर चालक कारवाहीमा पर्दा रु १६ लाख ९४ हजार पाँच सय र ९८८ टेम्पो चालक कारवाहीमा पर्दा रु छ लाख ७४ हजार ५०० राजश्व सङ्कलन भएको जनाइएको छ । चालु आर्थिक वर्षको आठ महीनामा दाङमा मादकपदार्थ सेवन गरेर सवारी साधन चलाउने ५६० चालक कारवाहीमा परेका ट्राफिक प्रहरी प्रशासन शाखाका जवान लालबहादुर देउवाले जानकारी दिए ।
सवारी दुर्घटनाको कारण मादकपदार्थ सेवन गरेर गाडी चलाउनु प्रमुख कारण देखिएको भन्दै ट्राफिकसँगै नेपाल प्रहरीले जाँचमा निकै कडाइ गर्दै आएको छ । सबैभन्दा धेरै मोटरसाइकल चालक मादकपदार्थ सेवन गर्ने देखिएका छन् । आठ महीनामा ४५२ मोटरसाइकल चालक कारवाहीमा पर्दा रु चार लाख ५२ हजार राजश्व सङ्कलन भएको छ ।
त्यसैगरी ४५ टेम्पो चालक, २५ जीप चालक, २१ ट्र्याक्टर चालक, १४ ट्रक चालक र तीन बस चालक मादकपदार्थ सेवनका कारण कारवाहीमा परेका छन् । यसैबीच मादकपदार्थ सेवन गरेर गाडी चलाएका कारण दुर्घटना भएपछि केही चालकमाथि मुद्दा चलाएर कैद सजायसगै जिल्ला प्रशासनबाट जरिवानासमेत हँुदै आएको छ । रासस



रासस

बुटवल अनलाइन रासस को ग्राहक हो

लेखक बाट थप

प्रतिक्रिया

सम्बन्धित समाचार