संसद् बैठक : संयुक्त सैन्य अभ्यास रोक्न माग - Butwal Online
संसद् बैठक : संयुक्त सैन्य अभ्यास रोक्न माग

काठमाडौँ, २६ भदौ । सत्तारुढ तथा प्रतिपक्षी दलका सांसदले मुलुकको परराष्ट्र नीति विपरीत हुने कूटनीति गतिविधिलाई नियन्त्रण गरिनुपर्नेमा सरकारको ध्यानाकर्षण गराएका छन् ।



प्रतिनिधिसभाको आज भएको बैठकको विषेश समयमा आफ्नो धारणा राख्दै उनीहरुले कूटनीतिक समान धारणा बनाएर नेपालले असंलग्न परराष्ट्र नीति विपरीत कुनै पनि मुलुकको पक्ष वा विपक्षमा लाग्न नहुने धारणा राखे ।

सत्तारुढ नेपाल कम्युनिष्ट पार्टी (नेकपा) का सांसद पम्फा भुसालले ‘इण्डोप्यासिफिक’बारे सरकारलाई अमेरिकी राजदूतावासले स्पष्टिकरण सोधेको भन्ने विषयको यथार्थ जानकारी दिन माग गरिन । नेकपाका अध्यक्ष पुष्पकमल दाहाल ‘प्रचण्ड’ले चिनियाँ विदेशमन्त्री वाङ यीसँग भएको भेटवार्ताका सम्बन्धमा भएको कुराकानीको विषयलाई लिएर अमेरिकी राजदूतावासले स्पष्टीकरण सोधेको भन्ने विषयबारे सरकारसँग जवाफ माग गरिन ।

उनले भनिन्, “पूर्वप्रधानमन्त्रीसमेत रहनुभएका नेकपाका अध्यक्ष ‘प्रचण्ड’ले चिनियाँ विदेशमन्त्रीसँग गरेको कुराकानीको विषयलाई लिएर अमेरिकी दूतावासले स्पष्टीकरण सोधेको हो कि होइन ? यदि त्यस्तो हो, भने सार्वभौम मुलुकको कूटनीति विपरित छ, यस्ता गतिविधि नियन्त्रण गर्न राज्य बेलैमा सजक हुनुपर्छ ।”

सांसद भुसालले अमेरिकी सेना र सशस्त्र प्रहरीबलबीच हुने भनिएको सैन्य अभ्यास रोक्न पनि माग गरेकी छन् । उनले छिमेकी मुलुक चीन र अमेरिकाबीच व्यापारिक विवाद चुलिएको सन्दर्भमा, असंलग्न परराष्ट्र नीतिविरुद्ध कुनै पनि एलाइन्समा लाग्न नहुने भन्दै पञ्चशिलको सिद्धान्तम अडिक रहेर यस्ता तालीम सञ्चालन गर्न नदिन सरकारको ध्यानाकर्षण गराईन ।

अमेरिकाले अन्नपूर्ण सर्किट र कुरिनटारमा आगामी नोभेम्बर महीनामा सैन्य अभ्यास गर्ने भन्दै उनले निवेदन दिएको सुन्नमा आएकोले त्यस्तो प्रकारको अभ्यास नगर्न आग्रह गरिन । नेपाल इन्डोप्यासिफिक सैन्य समूहमा नरहेकाले उक्त अभ्यास गर्न नहुने सांसद भुसालको भनाइ थियो ।

प्रमुख प्रतिपक्षी दल नेपाली काङ्ग्रेसका सांसद अमरेशकुमार सिंहले सरकारको परराष्ट्र नीतिको कमजोरीले मुलुकलाई अफ्ठयारो पारेको आरोप लगाए । उनले पछिल्ला भ्रमणको विषयलाई लिएर विभिन्न विषय सतहमा आएको तथा दुवै छिमेकी मुलुक भारत र चीनलाई समान व्यवहार गरिनुका साथै ‘इन्डो प्यासिफिक अलाइन्स’ र ‘बिआरआई’ जस्ता समूहमा नेपालले सदस्यता लिन नहुने धारणा राखे ।

काङ्ग्रेसकै सांसद सांसद सञ्जय गौतम र सुजाता परियारले दशैँ, तिहारजस्ता महत्वपूर्ण चाड पर्व नजिएिकसँगै दैनिक उपभोग्य वस्तुमा महङ्गी, कालाबजारी बढेको भन्दै त्यसलाई नियन्त्रण गर्न सरकारको ध्यानाकर्षण गराए । सांसद गौतमले डेङ्गु प्रकोपबारे तालुकदार मन्त्रालयले बेवास्था गरेको भन्दै स्वास्थयमन्त्रीको आलोचना गरे ।

राष्ट्रिय जनता पार्टी (राजपा) का सांसद महेन्द्रराय यादवले तराई क्षेत्रमा केही समय पहिले बाढीको समस्या भएको अहिले खडेरीले कृषिजन्य बालीनाली नष्ट हुने अवस्थामा आएको भन्दै सरकारको ध्यानाकर्षण गगराए।

नेकपाका सांसद राजबहादुर बुढाले निजीक्षेत्रको मोबाइल फोन सेवाप्रदायक कम्पनी एनसेलले सर्वोच्च अदालतको फैसला बमोजिम कर तिर्न अटेरी गरेको भन्दै त्यस विषयमा कडा कदम चाल्न सरकार समक्ष माग गरे । काङ्ग्रेस सांसद किरण गुरुङले भ्रष्टाचार नियन्त्र, सुशासन कायमलगायतका कार्यका लागि सरकारको ध्यानाकर्षण गराए ।

रासस

बुटवल अनलाइन रासस को ग्राहक हो

लेखक बाट थप

प्रतिक्रिया

सम्बन्धित समाचार